港耆歌詞 | 摩四青年
港耆歌詞 | 摩四青年 | 組合 | 新歌快遞 | 經典廣東歌 | 香港填詞人 | Global Music | 主頁
作詞：桑爺 | 尤老 | 蘇伯
主唱：摩四青年
港耆歌詞
桑爺：
我過埋今個月就七十八（蘇伯：又甩頭髮）
血脂血糖全部都唔合格（蘇伯：你無辦法）
上次入廠係衰條前列腺（蘇伯：輸精管啊）
尿頻尿急分叉唔成直線（蘇伯：輸清盤啦）
桑爺：
以前我好突出 （蘇伯：動L）
青春期好反叛
宜家我仲突出
不過係椎間盤（痛仔）
講嘢慢企唔穩 燈泡都唔敢換
我唔求好得返呀 我但求唔癱瘓
尤老：
挑 有錢讀死書
我做運輸都一樣咁風流（蘇伯：鹹濕仔）
有賭未為輸 俾襯家誅
要避一避風頭
後生我猛咁溝女
依家支梘液溝水
入教會試吓懺悔
得閒又氹吓修女（桑爺：收嗲）
蘇伯：
荒謬 有女又點 愛係有條件 錢根本無得搵夠
仔女好明顯 等緊我嚿錢 想我收皮我點忍受
叫我鼓勵吓年青人 我想翻睇鄧碧雲咋
（桑爺：舒服）
佢哋話我唔精神 份人壽要加多個受益人喎
桑爺：
我買Win跑Place 賽果似做馬
買Place佢跑尾 領先就墮馬
我試過唔信邪（吓話）
我轉玩百家樂
（蘇伯：一推）
米芝蓮變buffet buffet變大家樂
尤老：
唉 贏要谷輸更要谷
咩唔輸得啫 搵大耳窿
惹埋官非老婆失踨
見時運低我就拜車公（蘇伯：真之呀）
爭監護權根本打唔完
佢想屈我逼我斷六親
定係拍爛檔幫我揼貸款
係頂盡一齊跳國金
蘇伯：
成個月先見得一次個孫 都無乜傾開計
疲態盡露我腰骨好酸 瞓醒原來喺醫院通波仔
張生死紙我都未簽本來留返天光睇
嚟緊過年我未走嘅 啲年糕幫我煎多底
（桑爺：喫蕉啦你）
桑爺：
你條粉腸有血壓高？（睇過）
又話枕住食雪蛤膏？（蘇伯：吹呀）
你哋隨便喫餐飯呀 嚿錢都夠我交租
我哋諗緊轉邊款藥 你就諗緊買邊隻撈
你哋成屋都係工人 我就得個電飯煲
桑爺：
我哋最積極養生 郁啲就凍親
無野做嘅話就約打牌 動下腦筋
搭車比兩蚊 攞緊生果金
有人富貴 有人貧 出身喺草根
桑爺：
折扣幾多仲計緊 儲緊印花換禮品
蘇伯：我食慣鮑參翅肚
桑爺：我餐餐超力米粉
蘇伯：我張白金卡可以換機票
桑爺：你一程機多數成褲尿
蘇伯：坐Business Class
我身體差 講起我都好耐無起機了
桑爺：
你喺泰國keep住massage
The old man push the car
(蘇伯：Pushing呀）
不過都唔夠啲權威
一程Trip成堆襯家
（蘇伯：你仲發達）
尤老：
頭家係走淨隻狗
前妻又分車分樓
以前揸馬莎拉蒂
宜家食罐頭粟米
蘇伯：唉～係咪衰呢
桑爺：你話你呀
蘇伯：學人離婚
桑爺：點埋尾呀
蘇伯：佢以為女多人不怪呀
桑爺：點知副身家行得快呀
尤老：
調位貼咁埋 你想誅定鬆呀
東拼西湊博鋪大
桑爺：你幾廿歲人先搵工
尤老 : 我六番先食廣東牌
蘇伯：廣東牌我點樣擺 啱啱我有花未摸牌
桑爺：小喇叭 快啲搵人嚟
我哋冇打花 嗰隻一索嚟
尤老：喂 我有五隻
桑爺：嗰啲萬子嚟
尤老：喂 咁臭嘅
蘇伯：係 我瀨屎嚟
尤老：咪攝張紙皮 我地繼續嚟
想割禾青 明剃眼眉 （自摸冧莊）
桑爺：我怕搞到啲後生 我搵緊老人院
（蘇伯：你等封釘啦）
蘇伯：我個新婦都就生 我搵緊個陪月
（桑爺：入孤兒院啦）
尤老：啲相我間中都睇返
桑爺：你望吓佢咪算囉
尤老：搵間護士夠後生嘅 反正要長住
桑爺：
鬼叫我以前蒲得勁呀
搵到唔識剩呀
我無嘢留到比佢哋
要面又唔敢認呀
蘇伯：
每有痛苦也難透露
係呀 勉強可以行兩步
我試過揮霍見過醜惡
撥開雲霧還有霧（兩腳一伸呀）
尤老：
講大話似易通行
心底話講出至攻喉
埋尾乜叉都唔識用
到頭嚟淨低支白花油過世
桑爺：我哋淨係想要有人陪
蘇伯：次數唔使密
尤老：我想有返少少存在感
摩四老年：唔再當我死物
桑爺：
我哋最積極養生 郁啲就凍親
無野做嘅話就約打牌 動下腦筋
搭車比兩蚊 攞緊生果金
有人富貴 有人貧 出身喺草根
摩四青年 | 組合 | 新歌快遞 | 經典廣東歌 | 香港填詞人 | Global Music | 主頁
